सौर्यमण्डलको एउटा यस्तो ग्रह जहाँ हुन्छ ४२ वर्ष दिन र ४२ वर्ष रात !

धरातल अनलाईन
२०७९ कार्तिक २५ गते शुक्रबार १७:२९:०० मा प्रकाशित

हाम्रो सौर्यमण्डलका सबै ८ वटा ग्रहहरु आफैंमा विशेष यो अर्थमा छन् कि सबैका आ आफ्नै अद्वीतीय विशेषताहरु छन् । सौर्यमण्डलको तेश्रो ठूलो ग्रहको रुपमा रहेको अरुण ग्रह घनत्वका आधारमा चाहिं चौथो ठूलो ग्रह हो ।

यो ग्रह अधिकांश ग्याँसबाट बनेको ग्रह हो । त्यसैले यसलाई ग्याँस दानव पनि भनिन्छ । अरुण ग्रह अनेक खालका रहस्य र अनौठा तथ्यहरुले भरिएको छ । यो ग्रह आफ्नो अक्षमा ९८ डिग्रीको कोणमा झुकेको छ ।

सोही कारण यस ग्रहमा निकै असामान्य मौसम हुन्छ । त्यहाँ सधैंजसो आँधीबेहेरी चल्दछ । हावाको उच्चतम गति ९०० किलोमिटर प्रतिघण्टासम्म पुग्दछ । अर्को सबैभन्दा रोचक तथ्य त के भने अरुण ग्रहमा ४२ वर्षसम्म रात हुन्छ र अर्को ४२ वर्षसम्म दिन ।

जसका कारण अरुण ग्रहको एउटा ध्रुव लगातार ४२ वर्षसम्म अँध्यारो हुन्छ भने अर्को ध्रुवमा सूर्यको प्रकाश पर्दछ । अरुण ग्रह सूर्यबाट झण्डै ३ अर्ब किलोमिटर टाढा छ । त्यसैले यो ग्रहको तापक्रम निकै चिसो छ ।

त्यहाँको औसत तापक्रम माइनस १९७ डिग्री छ । वैज्ञानिकहरुका अनुसार अरुण ग्रहको न्यूनतम तापक्रम माइनस २२४ सम्म पुग्दछ । सूर्यबाट निकै टाढा हुनाले यो ग्रहमा सूर्यको प्रकाश पुग्नका लागि दुई घण्टा ४० मिनेट समय लाग्दछ ।

जबकि पृथ्वीमा सूर्यको प्रकाश आइपुग्नका लागि ८ मिनेट २० सेकेण्ड लाग्दछ । यो ग्रहले आफ्नो कक्षमा एक फन्को लगाउनका लागि १७ घण्टा लगाउँदछ । यसको अर्थ अरुण ग्रहमा १७ घण्टाको एक दिन हुन्छ । यहाँको एक वर्ष पृथ्वीको ८४ वर्ष बराबर हुन्छ ।