दाङमा २५०० बिघा जग्गा अझै पनि ‘माओवादी’ कब्जामै

दाङ । संस्कृत विश्वविद्यालय सञ्चालनका लागि २०१० सालमा ५६ जनाले जग्गा दान गरे । दाताको कदर गर्दै जग्गाको विवरणसँगै संस्कृतमा श्लोक लेखियो, जसको आशय छ, ‘भूमि दानभन्दा विशेष दान अरू छैन, भूमिहरण गर्नुजस्तो विशेष पाप अरू छैन ।’

तर यही आशयलाई खिल्ली उडाउँदै दानबाट प्राप्त विश्वविद्यालयको देउखुरीस्थित १ हजार ३ सय २६ बिघा ७ धुर जमिन १८ वर्षदेखि कब्जामा छ । सशस्त्र द्वन्द्वका बेला ०५८ सालमा तत्कालीन विद्रोही माओवादीले राजपुरस्थित विश्वविद्यालयको सम्पर्क कार्यालय भत्काई विस्थापित गराएपछि गुमेको जग्गा अहिलेसम्म फिर्ता हुन सकेको छैन । अधिकांश जग्गा किसानले कब्जा गरेका छन् ।

केही जग्गा प्रहरी चौकी र मन्दिरका नाममा कब्जा छ । सतबरियाको वनघुस्रीस्थित १० बिघा जमिन मात्रै ठेक्कामा लगाइएको नेसंवि देउखुरी जग्गा व्यवस्थापन समिति संयोजक माधव अधिकारीले बताए । अन्य सबै जग्गा अरूकै नियन्त्रणमा रहेको उनले बताए । कतिपय पक्की घर बनाएर बसिसकेका छन् भने कतिले मौखिक रूपमै किनबेच गरिरहेका छन् । नेसंविले जग्गाको राजस्व तिरिरहे पनि आयस्ता केही पाउन सकेको छैन ।

‘जग्गाको पोत नियमित बुझाइएको छ, आयस्ता केही पनि पाउन सकिएको छैन । द्वन्द्वमा कब्जा भएको जग्गामा अहिले विभिन्न व्यक्तिले रजाइँ गरिरहेका छन्,’ संयोजक अधिकारीले भने, ‘बिनाकागजात बिक्री गर्ने, घर बनाउनेजस्ता काम भइरहेका छन् । दानबाट पाएको जग्गा पनि कब्जा भयो ।’ 

तत्कालिन माओवादीले दाङमा कब्जा गरेको २५ सय बिघा जग्गा अझै फिर्ता भएको छैन । नेपाल विश्व विद्यालयको १३ सय, स्वर्गद्धारी आश्रमको १२ सय र जिल्ला प्रशासन कार्यालयको १४ बिघा जमिन अझै पनि कब्जामा रहेको प्रमुख जिल्ला अधिकारी गोविन्द रिजालले बताए । संस्थागत रुपमा कब्जा भएका जग्गाको आम्दानी जग्गाधनीले २०५८ सालदेखि नै नपाएको उनले बताए ।

द्धन्द्धका समयमा माओवादीले दाङमा विभिन्न व्यक्तिका १९ सय बिघा जग्गा कब्जा गरेको थियो । माओवादीले शान्ति प्रक्रियासँगै व्यक्तिको जग्गा फिर्ता गरेको छ तर विश्वविद्यालय र आश्रमको जग्गा भने फिर्ता नगरेको तत्कालिन माओवादीका जिल्ला नेताले बताए । 

कान्तिपुर अन्नपुर्ण पोष्ट दैनिकबाट


 

प्राप्त प्रतिकृयाहरू

यसमा तपाइको मत

प्रतिक्रिया थप्नुहोस्

लोकप्रिय