६ श्रावण २०८१, आइतबार

गुल्मी २ मा एमालेका गोकर्ण विष्ट विजयी

गुल्मी । गुल्मी क्षेत्र नम्बर २ मा नेकपा (एमाले)का गोकर्ण विष्ट विजयी भएका छन् । उनले निकटतम प्रतिद्धन्द्धी एकिकृत समाजवादीकी रामकुमारी झाँक्रीलाई २ हजार ३४ मतान्तरले पराजित गरे ।

आफ्नै पूर्वसहकर्मीलाई पराजित गर्दै जित निकालेका विष्टले २८ हजार ४ सय ७६ मत ल्याए । झाँक्रीले २६ हजार ४ सय ४२ मत पाएकी छन् । विष्ट यसअघि ०५६, ०७० र ०७४ मा प्रतिनिधी सभा सदस्यमा निर्वाचित भएका थिए । यो जितसँग उनले संसदीय चुनावमा ह्याट्रिक पूरा गरेका छन् ।

को हुन विष्ट ?

गोकर्ण विष्ट नेकपा (एमाले)का केन्द्रिय सचिव हुन् । उनी इस्मा गाउँपालिका ४ दोहली बाँझमा २०२२ साल असार १७ गते जन्मिएका हुन् । 

बिष्टले ०३५÷०३६ सालको विद्यार्थी आन्दोलनमा सहभागी भएर राजनैतिक यात्राको सुरुवात गरेका हुन् । उनी अनेरास्ववियुको प्रारम्भिक कमिटी सदस्य हुँदै गुल्मी अध्यक्ष बने । 

२०५० सालमा प्रजातान्त्रिक राष्ट्रिय युवा संघको सहसचिव र २०५६ सालपछि दुई कार्यकाल अध्यक्ष बने । त्यसपछि एमाले वागमती अञ्चल कमिटीहुँदै केन्द्रीय प्रचार विभाग प्रमुख, संगठन विभाग प्रमुख र युवा संगठनको केन्द्रीय विभाग प्रमुख बने ।

२०६५ सालमा पार्टीको केन्द्रीय सदस्य निर्वाचित भएसँगै युवा तथा विद्यार्थी विभाग प्रमुख, बुद्धिजीवी विभागको इञ्चार्जको जिम्मेवारी पाएका उनी २०७१ मा केन्द्रीय सचिव बने । व्यवस्थापनमा स्नातकोत्तर र कानूनमा स्नातक गरेका उनी राजनीतिक आन्दोलनका क्रममा पटक–पटक धरपकडमा परे ।

बिष्ट ०६८ सालमा चार महिना र ०७४ चैत २ देखि २१ महिना श्रम, रोजगार तथा सामाजिक सुरक्षा मन्त्री भए ।  निर्वाचित भएपछि क्षेत्र फर्किर काम गर्ने नेपालका बिरलै मध्येका नेता मध्येमा गोकर्ण पर्छन ।

झाँक्रीले हार स्वीकार गर्दै निर्वाचन आफ्ना लाथि लागि अत्यन्तै रोमाञ्चक रहेको बताएकी छिन् । उनले मतदातालाई धन्यवाद दिंदै बिष्टलाई बधाई समेत दिएकी छिन् ।

उनले फेसबुकमा लेखेकी छन, “ज्ञानको हिसावले कुनै प्रसिद्ध विश्वविद्यालयमा पढेभन्दा बढी । समाज र सामाजिक जीवनका थुप्रै पक्षको बारेमा समाजको पिंधसम्म पुगेर हेर्ने, बुझ्ने, जान्ने मौका पाएँ । जय र पराजय सामान्य प्रक्रिया हुन् । मैले अत्यन्तै सहज रूपमा लिएको छु । मेरो पक्षमा हजारौं मतदाताले आफ्नो अभिमत दिनु भएको छ, यसप्रति म सधै ऋणी हुनेछु ।”

प्राप्त प्रतिकृयाहरू

यसमा तपाइको मत

प्रतिक्रिया थप्नुहोस्